ده يابنى مش تحريض على العصيان

ده يابنى مش تحريض على العصيان انما يابنى نصيحة من قلب مخلص زهقان
فى البداية اقولك يابنى انا بحب جيشى وامنى وبحبك كمان

لكن ما بحب الظلم لو صدر من اى انسان مهما كان

وعلشان كده بقولك من قلب مخلص وانت عارف قد ايه بحبك

اوعى عقلك يقولك ترفع سلاحك على غلبان

كل همه عايز كرامته ولقمة العيش ويكون انسان
من ناس داست على انسانيته كمان وكمان
ده يابنى مش تحريض على العصيان
انما يابنى نصيحة من قلب مخلص زهقان
يمكن رصاصتك تيجى فى اخوك بالغلط
ولو كان حتى مش احوك حتروح فين من اللى خلق
انت رفعت السلاح وبقصد وتعمد اطلقت الرصاصة
اوعى يا بنى عقلك يوزك وتقولى انك بتدافع عن الوطن
اللى قتلته عمره ما كان عدو وطن
اه صحيح كان عدو الناهشين والهابرين وما اكثرهم يا وطن
كان عايز حقك قبل حقه ولما انضرب وفشل وانسجن
نزل يصرخ يقول حرام ننسرق وفى النهار ننضرب واحنا عملنا ايه
علشان تفرضوا علينا الظلم والطغيان والمذلة والمسكنة
وقال معدش عندى شيئ اخاف عليه او ابكى ليه
بعد ما نزفت الكرامة ودقت الاهانة
وانت يبنى قلت ايوه صح بس يا فندى الاوامر
قمت انت بدم بارد اطلقت الرصاصة
واديته الكرامة بالشهادة وخلصتة من اللئامى وذل الاهانة
بس عارف يا بنى ايه اللى ما قلوش عليه
ان ربك راح يحاسبك حساب عسير لانك قتلت اسير
رفض الاهانة والذل والظلم ونزل يستجير
قمت انت سمعت الكلام وببلادة اطلقت اللجام
ورفعت سوط الاهانة وعصر الندامة وطلقات اللئام
ده يابنى مش تحريض على العصيان
انما يابنى نصيحة من قلب مخلص زهقان
عمرك ما راح تبقى فوق لما تسمع كلام اللى فوق
اللى ضربوا يا بنى شعبنا وسابوا العدو الحقيقى
اللى يابنى سابوا الفساد يسرى فى جسم بلدك
وباركوه وايدوه وساعدوه ولاءوا الكروش
وانت بطيبتك يا بنى صدقتهم ان احنا الوحوش
وقالوا لك لازم يدخلوا القفص او نخلص عليهم
قال ايه يابنى علشان نريح ونستريح منهم
اللى بتقتلهم فى ضهرنا وانت منا واللى يصيبا يصيبك
كلام يا بنى ما يوافق حقيقة والامر واضح للعيان
وبكرة تقضى مدتك وتنزل للميدان زينا
لما تعرف انك قتلك يا بنى اللى كان يعانى
اللى عانيته بنفسك بعد ما قضيت يا بنى مدتك
ده يابنى مش تحريض على العصيان
انما يابنى نصيحة من قلب مخلص زهقان
يا بنى مصر للاسف ما عاشت حقيقة واحدة لعقود
كله يابنى كذب وتلفيق وتدليس وضحك على الدقون
عايز يا بنى تكون سند للى افسد واللى سرق واللى نهب
دا احنا يا بنى فى الميدان عايزين نصلح احوالنا
مش عايزين فلوس او دعاية الا الصلاح والحب والفلاح
لكن رصاصتك الغادرة طولت المسافة وقضت على الامال
رصاصة غادرة من ايد مغيبة يدفعها اللئام
ده يابنى مش تحريض على العصيان
انما يابنى نصيحة من قلب مخلص زهقان
ويا ابنى خدها منى نصيحة اوعى تنسى اللى لا يغفل ولا ينام
والطاعة للرويسا لازم بس ما تكون فى معصية الحنان المنان
وربى يا ابنى لا يمكن يقولك اقتل اللى عايز يرفع راسك واتظلم
ملقاش مكان الا الميدان يطالب بحقه من اللى ظلمه ومش عارف يفلفص
اوعى يابنى فى عون اللى ظلمه لانه بكره راح يظلمك انت كمان
واعمل يابنى اللى انت عايز تعمله وان شفت ان الميدان ظالم اقتله
بس حاسب ضميرك واسأل نفسك سؤال الناس دى نازله ليه
وبص حواليك وفكر هيه البلد دى بلدنا ولا بلد الفاسدين
اللى اكلوها والعة ورموا لينا الفتات واستغربوا واستعجبوا ان احنا نشكى
شفت لما الاحوال تنقلب والعجب ان الظالم مش عاجبه المظلوم يصرخ
وليه الصراح ما احنا بنرمى ليه الفتات صحيح علشان يوطى
لكن المهم اننا بنرميلهم الفتات
ده يابنى مش تحريض على العصيان
انما يابنى نصيحة من قلب مخلص زهقان